Ауа-райының қолайсыздығы туралы бірнеше рет жарияланған ескертулерге қарамастан кейбір туристер Іле Алатауы тауларында өз өмірлерін қауіп-қатерге тігуді жалғастыруда.
Алматы қаласы Құтқару қызметінің құтқарушылары Көкжайлау шатқалында сондай қауіп-қатерге әуесқойлығы бар 24 жастағы алматылық азаматты кездестірді. Әбден тоңып мұздап қалған 24 жастағы алматылықты құтқарушылар тобы 00 сағат 19 минутта 2850 метр биіктіктен тауып алған. Аяғын зақымдап алған туриске құтқарушылар дәрігерлік көмек көрсетіп, оны қалаға жеткізді.
Құтқарылған алматылықтың айтуынша ол алдын ала жоспары бойынша бірнеше күнді тауда өткізгісі келген. Көкжайлау шатқалына күндіз көтерілген ол, түнде сол жерге түнеп, келесі күні сапарын жалғастырмақшы болған. Шатыр орнатқаннан кейін жабайы аңдардың дауысын естіп, жоғары көтерілмекші болғанда аяғын жарақаттап алған.
Алматы қаласының Құтқару қызметі қала халқы мен қонақтарына «Қазгидромет» РМК – ның алдымыздағы күндерге жарияланған, ылғалды қар мен бұршақ, күшті желдің күтілуіне байланысты дабылды ескертулеріне назар аударуды сұрайды. Төтенше жағдайды болдырмас үшін таулы жерлерге шықпауларыңызды ескертеді.
Алматы қаласы әкімі аппараты ШЖҚ
«Алматы қаласының Құтқару қызметі» МКК
Баспасөз қызметі
